ក្រៅពី NIO ពេលនេះមានក្រុមហ៊ុនចិនមួយទៀតហើយ បញ្ចេញឡានអគ្គិសនីខ្នាតធំ សាកម្ដងជិះបាន ១០០០ គម

កាលពីពេលថ្មីៗនេះ តាមការចុះផ្សាយពីវេបសាយ Green Car បានឲ្យដឹងថា ក្រុមហ៊ុនផលិតឡានអគ្គិសនីធំមួយរបស់ចិន ជាបុត្រសម្ពន្ធនឹង Geely ឈ្មោះថា Zeekr ទើបតែប្រកាសចេញឡានអគ្គិសនីម៉ូដែលថ្មីរបស់ខ្លួន ដែលប្រើប្រាស់អាគុយពីក្រុមហ៊ុនអាគុយធំជាងគេលើពិភពលោក ឈ្មោះថា CATL ដែលមានសមត្ថភាព អាចបើកបានចម្ងាយដល់ទៅ ១០០០ គីឡូម៉ែត្រ រាល់ពេលសាកពេញម្ដង។

<i>Luxury MPV EV Zeekr 009</i> — *Luxury MPV EV Zeekr 009*

តាមសេចក្ដីប្រកាសពី Zeekr បានឲ្យដឹងថារថយន្ដអគ្គិសនីម៉ូដែលថ្មី សមត្ថភាពខ្ពស់មួយនេះមានឈ្មោះថា Zeekr 009 ជាប្រភេទឡានអគ្គិសនី ពហុមុខងារប្រណិត ឬ Luxury MPV (Multi-Purpose Vehicle) ដំបូងគេ ប្រើប្រាស់អាគុយ Qilin Battery ផ្គួបនឹង បច្ចេកវិទ្យាជំនាន់ទី ៣ របស់ក្រុមហ៊ុន CATL។

CATL បានឲ្យដឹងថា អាគុយថ្មីនេះ មានថាមពលច្រើនជាងប្រព័ន្ធអាគុយ ៤៦៨០ format Cell របស់ Tesla ចំនួន ១៣% ជាមួយនឹងដង់ស៊ីតេថាមពល 255Wh/kg សម្រាប់បច្ចេកវិទ្យាអាគុយប្រភេទ លីចូមអ៊ីយ៉ុង និង 160Wh/kg សម្រាប់បច្ចេកវិទ្យាអាគុយប្រភេទ លីចូម ផូស្វាត ឬ LFP (Lithium Iron Phosphate)។

<i>EV Zeekr 001 Interior </i> — *EV Zeekr 001 Interior*

គួររំឭកថា មុនប្រកាសចេញ Zeekr 009 នេះ ក្រុមហ៊ុន Zeekr បានបញ្ចេញលក់ម៉ូដែល Zeekr 001 របស់ខ្លួនជាប្រភេទឡាន Crossover ទំនើបរួចមកហើយកាលពីឆ្នាំមុន ដោយរថយន្ដត្រូវបានតម្លើងដោយរោងចក្រ វៃឆ្លាតរបស់ខ្លួន ដែលគ្រប់ប្រតិបត្តិការ គឺដំណើរការដោយមនុស្សយន្ដសុទ្ធ។

ងាកមកក្រុមហ៊ុនផលិតអាគុយថាមពលខ្ពស់ CATL វិញ ក៏បានឲ្យដឹងដែរថា បន្ទាប់ពីបានធ្វើបច្ចុប្បន្នភាពអាគុយបច្ចេកវិទ្យាថ្មី នេះរួចរាល់ហើយ ខ្លួនបានចាប់ផ្ដើមដើរសហការជាមួយនឹងក្រុមហ៊ុនផលិតរថយន្ដអគ្គិសនីធំៗផ្សេងៗជាច្រើន ដោយកាលពីពេលថ្មីៗនេះ CATL ទើបតែប្រកាសកិច្ចព្រមព្រាងសហប្រតិបត្តិការជាមួយនឹងក្រុមហ៊ុនឡានកូរ៉េខាងត្បូង Hyundai ដើម្បីដាក់អាគុយនេះក្នុងរថយន្ដអគ្គិសនីម៉ូដែលថ្មីៗរបស់ Hyundai, Kia និង Genesis តែមិនបានបង្ហើបឲ្យ ដឹងថានឹងចាប់ផ្ដើមពីពេលណានៅឡើយទេ។

អត្ថបទ៖ Andra

ក្រៅពី NIO ពេលនេះមានក្រុមហ៊ុនចិនមួយទៀតហើយ បញ្ចេញឡានអគ្គិសនីខ្នាតធំ សាកម្ដងជិះបាន ១០០០ គម

អត្ថបទថ្មី

អត្ថបទទាក់ទង

វីដេអូ